మనసు మాట

కొన్ని సార్లు మాటలు సరిపోవు 
కొన్ని చాలా సార్లు 
అక్షరాలు అరువు తెచ్చుకున్నా 
అసంపూర్ణంగానే మిగులుతాయి
అసలు విషయం 
అంతరంగం దాటి రాదు 
మనసులోని మాటలన్నీ 
నీటి మీద నీటి రాతలైపొతాయి 
కొత్త ఆకుల నుండి పడిన 
పల్చటి పసిడి కాంతిలాంటి 
ఒక నవ్వు అకారణంగా చిగురిస్తుంది 
నా లోపలి నుండి ఏవరో
నా మదిని తట్టిన చప్పుడు 
నేను రాయని మాటలెవరో 
నా చెవిలో సన్నగా చెప్పారు 
నా తెలివికి తెలియని భాషని
నా కళ్లు సరళంగా పాటలా చదువుతున్నాయి 
నన్ను జయించిన నా మనసు 
నా మనసులోని నీకై 
మాటల పరిధి దాటి 
మౌనంగా ఓ కవిత లిఖించింది 
నీ మనసు ముందుంచింది 
ఏమీ తెలియనట్టు....
నా వెనకాల నక్కి ఎదురుచూస్తుంది... 

మహర్షి