మ"రణం" మేలు

పగటిని చితిపేర్చి రాత్రిని ఆజ్యం చేసి
నన్ను దినమంతా దహిస్తున్నావు
దగ్ధమవుతున్న బాధను
దూరమనే భయం హేలన చేస్తుంది
కరాల గరళాన్ని నీవే అందిస్తున్నావు
అమృతంలా అందుకోవడంతప్ప వద్దనగలనా
నా యదసడిని రణభేరిగా మార్చేసావు
నా ప్రతీ శ్వాసని సైనికుడ్ని చేసి
నాతొనే యుద్దం చేయిస్తున్నావు
బ్రతుకు చక్రాల సీల ఊడదీసి
ఉరకమని నన్ను ఉసిగొల్పుతున్నావు
ఊ అని నువ్వంటె
ఊపిరే వదలగలను
ఉరకడమా!!!!
గండ దీపంలాంటి
గుండెలోని ఆయువు
ఏనిమిషంలో ఏకొండలెక్కిపోతుందో
పోనీ పోనీ పొతేపోనీ
అని వదిలేయగలను కాని
నిన్ను వీడలేని నా ఆశలు
ఆఖరి ఆయువై ఆపేస్తున్నాయి...

మహర్షి